Humbja zgjedhore e listës së Aleksandar Vuçiq në Serbi ka shkaktuar pakënaqësi edhe tek përfaqësuesit e së djathtës evropiane.
Maximilian Krah, përfaqësues i Alternativës Gjermane për Gjermaninë (AfD) në Bundestag, vlerësoi se rezultatet e zgjedhjeve parlamentare në Serbi përfaqësojnë një tjetër dështim politik të forcave të krahut të djathtë në Evropë, shkruajnë mediat e huaja, përcjell Telegrafi.
Krah reagoi në rrjetin social X pasi Vuçiq pranoi humbjen e listës së tij, duke i lidhur ngjarjet në Serbi me humbjen e mëparshme zgjedhore të Viktor Orbán në Hungari.
“Nuk është një ditë e mirë. Pas Hungarisë, humbëm edhe Serbinë. Kjo tregon se e djathta duhet të riorganizohet. Koncepti aktual nuk mjafton për të bindur”, shkroi Krah.
Mesazhi i tij erdhi pas zgjedhjeve në të cilat lista e studentëve arriti një avantazh bindës ndaj listës së mbledhur rreth Aleksandar Vuçiqit.
Krah është anëtar i Bundestagut nga partia e ekstremit të djathtë Alternativa për Gjermaninë, një parti përfaqësuesit e së cilës kanë treguar më parë interes për zhvillimet politike në Serbi.
Reagimi i fundit i Krah tregon se ai e sheh humbjen politike të listës së Vučiqit në një kontekst më të gjerë evropian, domethënë si një dështim të rrethit politik me të cilin AfD ndan pikëpamje të caktuara.
Kujtojmë se në prill të këtij viti, Viktor Orbán humbi zgjedhjet pas 16 vitesh në pushtet, dhe tani edhe lista e Aleksandar Vuçiq e ka pranuar humbjen e saj zgjedhore.
Ndërkohë, sipas të dhënave nga Komisioni Zgjedhor i Serbisë, të përditësuara të hënën në orën 5:30 të mëngjesit, pas përpunimit të 91.84 për qind të qendrave të votimit, lista e studentëve fitoi 51.71 për qind të votave. Në të njëjtën kohë, lista e Vuçiq mori mbështetjen e 39.85 për qind të votuesve. /Telegrafi/