Një kolonë e gjatë automjetesh është krijuar në pikën kufitare të Bërnjakut, ndërsa qytetarë serbë nga Kosova po udhëtojnë drejt Serbisë për të marrë pjesë në zgjedhjet e parakohshme parlamentare.
Sipas mediave lokale në veri, kolona shtrihet në disa qindra metra dhe është krijuar nga fluksi i qytetarëve që janë nisur drejt vendvotimeve.
Për votuesit nga komunat e Kosovës janë caktuar vendvotime në Rashkë, Vranjë, Kurshumli dhe Tutin. Votimi ka nisur në orën 07:00 dhe do të përfundojë në orën 20:00.
Qytetarët serbë nga Kosova po votojnë në këto qytete, pasi autoritetet e Republikës së Kosovës nuk lejojnë organizimin e zgjedhjeve të Serbisë në territorin e vendit që nga viti 2023.
Burimi: dukagjini.com ↗