Gjilani dhe Llapi kanë ndarë pikët, duke barazuar 1-1 në kuadër të javës së 11-të të Superligës së Kosovës.
Në një ndeshje ku golat u shënuan në pjesën e dytë, Gjilani kaloi në epërsi në minutën e 69-të, kur Ardian Limani realizoi për 1-0.
Megjithatë, vendasit nuk arritën ta ruanin avantazhin deri në fund, pasi Llapi reagoi në minutat e fundit. Arbnor Aliu shënoi në minutën e 88-të, duke vendosur rezultatin përfundimtar 1-1.
Kjo ndeshje shënoi edhe debutimin e Zekirija Ramadanit në stolin e Gjilanit, por trajneri nuk arriti ta festonte me fitore para tifozëve të skuadrës së tij.
Në anën tjetër, barazimi nuk i jep fund serisë negative të Llapit, që tashmë ka shkuar në gjashtë ndeshje radhazi pa fitore në kampionat.
Pas këtij barazimi, Gjilani renditet në pozitën e tretë me 18 pikë, ndërsa Llapi zë vendin e parafundit, të nëntin, me vetëm pesë pikë të grumbulluara./Telegrafi/