Ushqimet si fasulet, sarmet, gullashi dhe supat nuk mund të ruhen në frigorifer pa afat, edhe nëse duken dhe kanë aromë normale.
Sipas rekomandimeve të agjencive të sigurisë ushqimore, mbetjet e ushqimit zakonisht duhet të konsumohen brenda dy deri në katër ditësh, pasi me kalimin e kohës rritet rreziku i helmimit nga bakteret.
Ushqimet që përmbajnë oriz kërkojnë kujdes të veçantë.
Foto ilustruese
Pilafi, rizotoja dhe gatimet e tjera me oriz rekomandohet të konsumohen brenda dy ditësh, pasi disa baktere mund të mbijetojnë edhe pas zierjes.
Edhe sallatat me makarona ose patate duhet të konsumohen brenda një afati të shkurtër.
Për të shmangur rreziqet, ushqimi duhet të vendoset në frigorifer sa më shpejt pas gatimit, jo më vonë se dy orë, dhe të ruhet në enë të mbyllura.
Ndarja në porcione të vogla ndihmon që ushqimi të ftohet më shpejt, derisa mbetjet që qëndrojnë jashtë frigoriferit për një kohë të gjatë mund të bëhen të pasigurta për konsum.
Kur ushqimi nuk do të konsumohet brenda afatit të rekomanduar, ngrirja është një alternativë e mirë.
Megjithatë, pas shkrirjes, mbetjet duhet të konsumohen brenda 24 orësh dhe nuk rekomandohet të ngrihen përsëri.
Gjithashtu, ushqimi duhet të ri-ngrohet plotësisht dhe, për siguri, të mos ri-ngrohet disa herë.
Një rregull i rëndësishëm: aroma, shija dhe pamja normale nuk garantojnë se ushqimi është ende i sigurt.
Prandaj, respektimi i afateve të ruajtjes është thelbësor për të shmangur helmimet ushqimore. /Telegrafi/