Elon Musk ka zbuluar planet ambicioze për Tesla Roadster-in e ri, i cili sipas tij do të jetë në gjendje të kryejë vetë marifete spektakolare, vetëm me një komandë nga pronari.
Musk tha se makina do të mund të përsërisë në mënyrë autonome manovrat e demonstruara gjatë prezantimit më 15 tetor, përfshirë lëvizjen përmbys, rrotullimet në ajër dhe uljen mbi rrota.
Sipas Tesla-s, këto manovra mundësohen nga një sistem shtytësish me gaz të ftohtë dhe rezervuarë me ajër nën presion të lartë, teknologji e ngjashme me atë që përdor SpaceX për kontrollin e anijeve kozmike.
Musk paralajmëroi gjithashtu ndërtimin e një piste ekstreme në selinë e Tesla-s në Teksas, ku pronarët do të mund të testojnë aftësitë e makinës.
Megjithatë, ende nuk ka një datë për prodhimin e modelit apo për funksionalizimin e pistës.
Prodhimi i Roadster-it pritet të nisë jo më herët se fundi i dekadës, ndërsa funksionet autonome dhe siguria e tyre mbeten pa shumë detaje të konfirmuara.
Pavarësisht premtimeve spektakolare, mbetet të shihet nëse Tesla do t’i shndërrojë këto demonstrime në teknologji të gatshme për përdorim real. /Telegrafi/