Prezantuesja çeke Sabina Jakšova foli pasi intervista e saj me David Oulehl, trajnerin e ekipit të ligës së dytë FK Viagem Usti nad Labem, e cila u bë virale në internet.
Biseda u regjistrua pasi ekipi i tij humbi 3-2 ndaj SFC Opava në fillim të këtij muaji, dhe tërhoqi vëmendjen sepse trajneri shmangu shikimin nga gazetari gjatë intervistës.
Në një intervistë me SunSport, Jaksova vlerësoi sjelljen e trajnerit dhe zbuloi se gruaja e tij Lucie ishte e kënaqur me kaq shumë vëmendje.
“Gruaja e tij i ndjek me kujdes intervistat tona dhe besoj se u gëzua që kjo intervistë u bë virale”, tha Jakšova.
“David ka një vullnet shumë të fortë dhe ne në klub jemi krenarë për të. Nuk e vura re që po shikonte diku tjetër sepse po përqendrohesha në atë që po thoshte”, shtoi ajo.
Ajo thotë se është e befasuar që videoja ka bërë jehonë në të gjithë botën.
“Jam mësuar me vëmendjen sepse FK Viagem Ustíi nad Labem është një nga klubet më të ndjekura në Republikën Çeke. Njerëzit më njohin në vendin tim dhe jam një prezantuese e njohur, por u befasova këndshëm që kjo është përhapur përtej kufijve tanë”, theksoi ajo.
Një pjesë e publikut e kritikoi për zgjedhjen e veshjeve gjatë intervistës, por Jakšova nuk sheh ndonjë problem në këtë.
“Nuk mendoj se vishem në mënyrë provokuese. Këtu në Republikën Çeke është normale që një grua të veshë rroba dhe taka të bukura kur del dhe dëshiron të duket bukur. Argëtimi është në thelb të marketingut tonë dhe gjithçka tjetër është ndërtuar rreth kësaj. Në Viagem ne besojmë se futbolli është si biznesi i shfaqjeve. E kuptoj që disa njerëz do të ishin të lumtur nëse do të isha e mbuluar, por nga ana tjetër, do të zhgënjeja edhe shumë njerëz”, tha ajo.
Ajo gjithashtu vlerësoi partnerin e saj, trajnerin e boksit Petar Petružalek, me të cilin ka dy fëmijë.
“Partneri im Petr dhe familja ime janë një mbështetje e madhe për mua. Ne kemi një marrëdhënie të mrekullueshme dhe plot dashuri”, tha ajo.
Jaksova më parë zbuloi se klubi i ofroi asaj punën e prezantueses direkt.
“Menaxhmenti i klubit më kontaktoi drejtpërdrejt dhe më bëri një ofertë. E pranoj se isha e lumtur dhe e befasuar në të njëjtën kohë. E mendova për pak kohë, por në fund thashë: ‘Pse jo? Do të përpiqem’. Megjithatë, nuk kisha përvojë, kështu që mësova gjithçka gjatë rrugës”, tha ajo në atë kohë. /Telegrafi/