Nikollë Ukaj, me origjinë nga Kosova, është nderuar me titullin e nderit “Doctor Honoris Causa” në Lidership Humanitar, në një ceremoni solemne të mbajtur në selinë e Kombeve të Bashkuara në Nju-Jork.
Lajmin e ka bërë të ditur vetë Ukaj përmes një postimi, ku ka shprehur mirënjohjen për këtë vlerësim, të cilin ia ka ndarë Centro Universitario de Ciencias e Investigación (CUCI).
Ai ka falënderuar rektoren e këtij institucioni, Dr. María Guadalupe Jiménez Armenta, si dhe drejtuesen e IPPDR-së, Dr. Andrise Bass, për dorëzimin e titullit.
Në ceremoninë e ndarjes së titujve të nderit ishte i pranishëm edhe ish-senatori amerikan Raymond J. Lesniak.
Ukaj ka thënë se këtë vlerësim e pranon me përulësi, duke e konsideruar një motivim për angazhimin e mëtejshëm në shërbim të komunitetit.
“E pranoj këtë vlerësim me përulësi dhe si motivim për angazhim të mëtejshëm në shërbim të komunitetit”, ka shkruar Ukaj./Zëri