Liverpool ka marrë epërsinë në garën për transferimin e Alex Scott, mesfushorit të Bournemouthit, dhe ka një avantazh të rëndësishëm ndaj Chelseat në përpjekjen për ta siguruar nënshkrimin e tij.
Scott është shndërruar në njërin prej mesfushorëve më premtues në Ligën Premier që nga transferimi nga Bristol City në vitin 2023. Forma e tij e mirë i ka siguruar edhe ftesën e parë te Kombëtarja e Anglisë, ku debutoi në fitoren 2-0 ndaj Çekisë gjatë pushimit ndërkombëtar. Ai më pas shkëlqeu në fitoren e thellë 7-0 ndaj Kroacisë, ku luajti përkrah Elliot Andersonit.
Paraqitjet e tij kanë bindur edhe tifozët e Bournemouthit se qëndrimi i tij në klub mund të mos zgjasë shumë, pasi interesimi nga klubet e mëdha evropiane po rritet.
Gjatë verës, Bournemouthi refuzoi disa oferta nga Chelsea për 23-vjeçarin, njëra prej të cilave thuhet se arriti në 78 milionë euro. Megjithatë, sipas raportimeve, klubi ka zbutur qëndrimin dhe mund të jetë i gatshëm ta shesë mesfushorin gjatë afatit kalimtar të janarit, pasi ai ka refuzuar të nënshkruajë kontratë të re. Marrëveshja aktuale e Scottit skadon në qershor të vitit 2028.
Sipas Daily Mail, Bournemouthi kërkon rreth 115 milionë euro për kartonin e tij, ndërsa Liverpooli konsiderohet në pozitë të favorshme për transferimin.
Një arsye e rëndësishme është lidhja e Scottit me trajnerin Andoni Iraola, i cili e solli atë te Bournemouthi nga Bristol City në gusht të vitit 2023 për rreth 29 milionë euro. Nën drejtimin e trajnerit spanjoll, mesfushori u zhvillua në një prej lojtarëve më të spikatur në pozitën e tij në Ligën Premier.
Iraola, i cili u largua nga Bournemouthi për t’u bashkuar me Liverpoolin gjatë verës, e njeh mirë potencialin e anglezit.
Kjo mund t’u japë “Të Kuqve” një avantazh në garën për shërbimet e tij, megjithëse shuma e kërkuar mbetet një pengesë e rëndësishme./Telegrafi/