Manchester City mund të përballet me sanksione të ndryshme nëse dështon në apelimin e vendimit për shkeljet e rënda të rregullave financiare të Ligës Premier dhe UEFA-s. Dënimi më i rëndë i mundshëm do të ishte rënia nga elita e futbollit anglez.
Klubi është shpallur fajtor nga një komision i pavarur për shkeljet më serioze në mesin e 115 akuzave, por vazhdon të mohojë përgjegjësinë dhe pretendon se ka prova të pakundërshtueshme në mbështetje të pafajësisë. City ka paraqitur apel, ndërsa çështja ende nuk është përfunduar. Për momentin, rënia nga liga mbetet vetëm një skenar hipotetik.
Megjithatë, nëse vendimi konfirmohet dhe City detyrohet të luajë në Championship, mediat kanë parashikuar se si mund të duket formacioni i skuadrës, duke u bazuar te talentet e akademisë dhe disa lojtarë që mund të vendosin të qëndrojnë.
Në portë, Pierce Charles shihet si kandidat për titullar. Portieri irlandez i veriut po fiton përvojë në Championship te Queens Park Rangers, ku është huazuar nga Sheffield Wednesday. Paraqitjet e tij dhe aftësitë në pritjen e goditjeve e shpërndarjen e topit mund ta bëjnë një alternativë serioze për Cityn.
Pierce Charles
Në mbrojtje, parashikimi është që Rico Lewis dhe Nico O’Reilly të qëndrojnë në klub, për ta ndihmuar skuadrën të rikthehet sa më shpejt në Ligën Premier. Në qendër të mbrojtjes do të luanin Stephen Mfuni, i cili po përfiton nga huazimi te Coventry City, dhe Abdukodir Khusanov, i cili ka kontratë me Cityn deri në vitin 2031.
Në mesfushë, Ayyoub Bouaddi, i transferuar nga Lille për rreth 115 milionë euro, mund të jetë një nga lojtarët që do ta pranonte një sezon në kategorinë e dytë. Krahas tij parashikohet të luajë Elliot Anderson, një tjetër përforcim i kushtueshëm, i cili gjithashtu ka fituar pozitë të rëndësishme në përfaqësuesen e Anglisë.
Phil Foden do të ishte emri kryesor në këtë formacion. Anglezi, i cili e ka kaluar gjithë karrierën te City, mund të marrë rolin e liderit në përpjekjen për rikthim në elitë. Sipas këtij skenari, ai mund të negociojë edhe një kontratë të ristrukturuar, ashtu siç bëri Jarrod Bowen pas rënies së West Hamit.
Divine Mukasa
Në repartin ofensiv, Divine Mukasa do të mund të përfitonte nga përvoja e fituar gjatë huazimit te West Hami. Ai është aktivizuar kryesisht si mesfushor qendror, por mund të luajë edhe më përpara. Antoine Semenyo parashikohet gjithashtu të qëndrojë, ndërsa talenti i ri Allan Ruiz, i ardhur nga Palmeiras, mund të marrë një rol në krahë.
Formacioni i parashikuar i Manchester Cityt në Championship:
Pierce Charles; Rico Lewis, Abdukodir Khusanov, Stephen Mfuni, Nico O’Reilly; Ayyoub Bouaddi, Elliot Anderson; Allan Ruiz, Phil Foden, Divine Mukasa; Antoine Semenyo.
Nëse City do të binte nga Liga Premier, largimet e disa yjeve do të ishin të pritshme. Një precedent i njohur është Juventusi, i cili pas rënies në Serie B në vitin 2006 humbi lojtarë si Zlatan Ibrahimovic, Patrick Vieira, Fabio Cannavaro dhe Lilian Thuram. Megjithatë, Gianluigi Buffon, Alessandro Del Piero, Pavel Nedved dhe David Trezeguet qëndruan dhe ndihmuan klubin të rikthehej në elitë.
Në rastin e Cityt, lojtarë si Erling Haaland, Jeremy Doku, Josko Gvardiol dhe Gianluigi Donnarumma mund të largoheshin përgjithmonë ose të huazoheshin te klube që luajnë në Ligën e Kampionëve, për t’u rikthyer pas promovimit./Telegrafi/