Arsenali po përballet me kritika për shkak të vendimit për të shkurtuar rreth 60 vende pune, vetëm pak ditë pasi zyrtarizoi rinovimin e kontratës së trajnerit Mikel Arteta, i cili pritet të bëhet trajneri më i paguar në Premier League.
Sipas raportimit të "The Telegraph", klubi londinez ua ka komunikuar punonjësve planin për reduktimin e stafit.
Njoftimi thuhet se është bërë nga drejtori i përgjithshëm i klubit, Richard Garlick.
Shkurtimet nuk do të prekin stafin teknik të skuadrave të meshkujve dhe femrave, as sektorin e të rinjve.
Jashtë këtij procesi do të mbeten gjithashtu fondacioni bamirës i klubit dhe departamenti i sigurisë.
Reduktimet pritet të përqendrohen kryesisht në disa sektorë operacionalë jashtë fushës së lojës.
Vendimi vjen pas shqyrtimit të strukturës organizative të klubit nga një kompani konsulente, e angazhuar për të analizuar funksionimin e brendshëm të Arsenalit.
Shpenzimet operative janë rritur ndjeshëm
Një nga arsyet kryesore që qëndrojnë pas këtij vendimi lidhet me rritjen e kostove operative të klubit.
Sipas raportimit, këto shpenzime janë rritur nga 148 milionë funte në sezonin 2024/25 në 201 milionë funte, afërsisht 239 milionë euro.
Në të njëjtën kohë, Arsenali ka vendosur ta vazhdojë bashkëpunimin me Artetën, duke ia zgjatur kontratën deri në vitin 2030.
Trajneri spanjoll pritet të përfitojë rreth 20 milionë funte në vit, ose afërsisht 23.7 milionë euro, pa përfshirë bonuset.
Me këtë marrëveshje, ai do të bëhet trajneri më i paguar në Premier League.
Kështu, ndërsa Arsenali investon shuma të mëdha për të siguruar vazhdimësinë e projektit sportiv të Artetës, klubi po planifikon njëkohësisht shkurtime të vendeve të punës në strukturën e tij administrative dhe operative. /Zëri