Federata e Futbollit e Palestinës ka kundërshtuar mundësinë e zhvendosjes së Kupës së Azisë 2027 nga Arabia Saudite, duke shprehur besimin e plotë se vendi do të jetë në gjendje ta organizojë turneun sipas planit të paraparë.
Reagimi vjen në një kohë kur situata e sigurisë në rajon ka ngritur pikëpyetje për organizimin e garës kontinentale, pas sulmeve të fundit në Arabinë Saudite dhe shqetësimeve për sigurinë e lojtarëve dhe tifozëve.
Përmes një deklarate zyrtare, federata palestineze shprehu solidaritetin e saj me Arabinë Saudite, udhëheqjen dhe popullin e saj, duke theksuar rëndësinë e ruajtjes së sigurisë dhe stabilitetit në vend.
“Federata e Futbollit e Palestinës shpreh besimin e plotë në aftësinë e Mbretërisë së Arabisë Saudite për të organizuar dhe pritur Kupën e Azisë 2027 sipas standardeve më të larta organizative dhe teknike”, thuhet në deklaratë.
Federata palestineze theksoi gjithashtu marrëdhëniet e ngushta mes dy popujve dhe mbështetjen historike saudite për çështjen palestineze dhe të drejtat e popullit palestinez.
Palestina e nis turneun kundër Arabisë Saudite
Pjesëmarrja në këtë garë ka rëndësi të veçantë për përfaqësuesen palestineze, pasi ajo pritet ta nisë aventurën në Kupën e Azisë 2027 pikërisht kundër Arabisë Saudite, në ndeshjen hapëse të turneut.
Kupa e Azisë do të zhvillohet nga 7 janari deri më 5 shkurt 2027, me 24 përfaqësuese pjesëmarrëse.
Arabia Saudite do ta organizojë për herë të parë këtë kompeticion kontinental.
Ndërkohë, pavarësisht diskutimeve për situatën e sigurisë, ende nuk është njoftuar zyrtarisht ndonjë vendim për zhvendosjen e turneut nga Arabia Saudite. /Zëri