Real Madridi, Adidas dhe marka e njohur braziliane e modës FARM Rio kanë prezantuar një koleksion të ri veshjesh dhe aksesorësh, i cili ndërthur identitetin e klubit madrilen me ngjyrat dhe motivet tropikale të Brazilit.
Koleksioni i ri synon të festojë lidhjen historike mes futbollit brazilian dhe Real Madridit, klub që ndër vite ka pasur në radhët e tij yje të mëdhenj nga ky vend, si Kaká, Marcelo, Roberto Carlos, Vinicius Junior dhe Rodrygo.
Linja e re përfshin fanella për nxehje para ndeshjeve, trenerka, bluza me kapuç, funde, shalle, kapele, çanta dhe çorape.
Veshjet dallohen për motivet e tyre botanike dhe ngjyrat e gjalla, të cilat ndërthuren me elementet karakteristike të Real Madridit.
Në këtë mënyrë, koleksioni nuk është menduar vetëm për ditët e ndeshjeve, por edhe për përdorim të përditshëm, duke bashkuar modën, kulturën braziliane dhe pasionin për futbollin.
Frymëzimi vjen nga plazhet e Brazilit
Ideja kryesore e fushatës është loja e njohur braziliane altinha, e cila luhet zakonisht në plazhe, ku pjesëmarrësit qëndrojnë në rreth dhe përpiqen ta mbajnë topin në ajër sa më gjatë.
Kjo lojë, ku rëndësi kanë bashkëpunimi, kreativiteti dhe kënaqësia e përbashkët, është përdorur si simbol i fuqisë së futbollit për të bashkuar njerëzit dhe kulturat e ndryshme.
Përmes këtij bashkëpunimi, FARM Rio sjell filozofinë e saj “Dress in Happiness”, ndërsa Real Madridi përfaqëson traditën e suksesit dhe mentalitetin fitues.
Koleksioni është tashmë i disponueshëm në dyqane të përzgjedhura të Adidasit, në dyqanet zyrtare të Real Madridit dhe përmes platformave zyrtare online të dy markave. /Zëri