Wayne Rooney ka kritikuar ashpër Lisandro Martinezin për deklaratat publike ndaj drejtuesve të Manchester Unitedit, duke e akuzuar mbrojtësin argjentinas për mungesë respekti ndaj bashkëlojtarëve pas humbjes 2-0 nga Atletico Madridi në Ligën e Kampionëve.
Pas disfatës, Martinez mbrojti trajnerin Michael Carrick dhe futbollistët e tjerë të skuadrës, por la të kuptohej se problemet e klubit shkojnë përtej paraqitjeve në fushë. Deklaratat e tij u interpretuan si kritikë indirekte ndaj drejtuesve dhe mënyrës se si klubi ka vepruar në tregun e transferimeve.
Komentet e argjentinasit rikthyen debatet për mënyrën se si është ndërtuar skuadra e Manchester Unitedit dhe nëse klubi ka investuar mjaftueshëm për të konkurruar në nivelet më të larta.
Megjithatë, Rooney beson se Martinez e ka tepruar duke i bërë publike pakënaqësitë e tij, në vend që t’i trajtonte ato brenda klubit.
“Mendoj se ai ndoshta ka shkuar paksa shumë larg dhe kjo çështje duhej të mbetej brenda klubit”, deklaroi ish-kapiteni i Manchester Unitedit gjatë transmetimit të ndeshjes së Ligës së Kampionëve në Amazon Prime Video.
Rooney shkoi edhe më tej, duke sugjeruar se vetë Martinez mund të jetë njëri prej futbollistëve që do të largohet nëse klubi vendos të ndërhyjë në skuadër.
“Ai dëshiron që klubi të investojë më shumë para për të sjellë më shumë futbollistë dhe, për ta bërë këtë, nëse jam i sinqertë, ai mund të jetë njëri prej lojtarëve që do të largohet”, u shpreh Rooney.
Legjenda angleze kritikoi edhe paraqitjet e mbrojtësit argjentinas, duke pretenduar se ato nuk kanë qenë në nivelin e duhur.
Ylli i Man Utd nuk përmbahet pas humbjes ndaj Atletico Madridit, kritikon ashpër drejtuesit e klubit
“Paraqitjet e tij nuk kanë qenë mjaftueshëm të mira. Ai po tregon mungesë respekti ndaj bashkëlojtarëve të tij. Kjo nuk do ta ndihmojë aspak situatën në të cilën ndodhet aktualisht klubi”, shtoi Rooney.
Megjithatë, ish-sulmuesi i Unitedit pa edhe aspekte pozitive në paraqitjen e skuadrës kundër Atletico Madridit, duke mos u pajtuar me vlerësimet se ekipi nuk kishte treguar asgjë inkurajuese.
Përplasja e deklaratave vjen në një periudhë kur Manchester Unitedi po përballet me kritika të shumta për rezultatet, politikën e transferimeve dhe drejtimin e përgjithshëm të klubit./Telegrafi/