Erling Haaland vazhdon të jetë vendimtar për Manchester Cityn. Sulmuesi norvegjez shënoi në fitoren 3-0 ndaj Liverpoolit në “Anfield”, duke dëshmuar edhe një herë instinktin e tij të jashtëzakonshëm para portës.
Goli i realizuar në minutën e 65-të ishte i gjashti për Haalandin në gjashtë ndeshjet e para të Premier Leagues këtë sezon.
Me një goditje të fuqishme dhe një koordinim të shkëlqyer, ai mposhti portierin Alisson, duke i hapur rrugën fitores së rëndësishme të skuadrës së Pep Guardiolës.
Pas ndeshjes, norvegjezi foli për paraqitjen e ekipit, por vëmendjen e mori edhe një moment argëtues që përfshinte babanë e tij, Alf-Inge Haaland, i cili ishte i pranishëm në tribuna dhe festoi me entuziazëm golin e të birit.
Haaland: Do t’ia dërgoj një mesazh babait
Në një intervistë për “Sky Sports”, sulmuesi i Manchester Cityt tregoi se kishte tentuar ta gjente babanë e tij pas golit.
“Nuk e pashë, po e kërkoja. Të them të drejtën, dukej sikur po kënaqej më shumë se kurrë, njësoj si vitin e kaluar. Mendoj se është kënaqur, kështu që tani do t’i dërgoj një mesazh”, deklaroi Haalandi me humor.
Norvegjezi foli edhe për shokun e skuadrës, Elliot Anderson, duke vlerësuar kontributin e tij në mesfushë.
“Kur mendoj për karakterin që treguam duke luajtur me dhjetë lojtarë në Old Trafford, emri i parë që më vjen ndërmend është Elliot. Ai e mori sërish kontrollin e ndeshjes, lufton në duele dhe bën atë që na nevojitet. Është një lojtar i shkëlqyer”, u shpreh sulmuesi.
“Duhet të qëndrojmë të bashkuar”
Haalandi theksoi se fitorja në “Anfield” kishte një rëndësi të veçantë për skuadrën, sidomos pas zhurmës së krijuar rreth çështjeve financiare të klubit.
“Gjithçka që dëshiron është të fitosh ndeshje. Të luash mirë, të bësh tifozët të lumtur dhe të fitosh. Kjo ishte një betejë mendore, sepse nuk është kurrë e lehtë të rikthehesh pas ndeshjeve të kombëtareve”, tha ai.
“Jam krenar që arritëm të qëndrojmë të bashkuar. Jemi të fortë mendërisht. Kemi shumë ndeshje përpara, ndaj tani është koha të rikuperohemi dhe të përgatitemi për sfidën e radhës”, përfundoi Haalandi.
Manchester City triumfoi 3-0 ndaj Liverpoolit, me Haalandin, Jeremy Dokun dhe Rayan Cherkin që realizuan golat e fitores në pjesën e dytë. /Zëri