Vinicius Junior rrezikon të dënohet me dy ose më shumë ndeshje pas përjashtimit në fitoren 1-0 të Real Madridit ndaj Villarrealit, më 10 tetor, duke vënë në pikëpyetje pjesëmarrjen e tij në El Clasico kundër Barcelonës, më 25 tetor.
Sipas raportimit të mediumit spanjoll “Fichajes”, gjyqtari Diaz de Mera ka përfshirë në raportin e ndeshjes një tërheqje të flokëve ndaj Nathan Saliba, në një moment kur topi ishte në lojë, por dy futbollistët nuk po e kontestonin atë.
Pas ndërhyrjes së VAR-it, goli i Viniciusit u anulua dhe braziliani u ndëshkua me karton të kuq direkt.Raporti i gjyqtarit përfshin edhe protestat e mëvonshme të sulmuesit, i cili u desh të mbahej nga bashkëlojtarët e tij. Megjithatë, gjyqtari ka theksuar se nuk ka arritur të identifikojë ndonjë shprehje konkrete të përdorur nga futbollisti.
Sipas nenit 130.2 të Kodit Disiplinor të Federatës Spanjolle të Futbollit (RFEF), veprimet e dhunshme jashtë kontestimit të topit mund të dënohen me dy deri në tri ndeshje pezullim.
Real Madridi do të përballet me Sevillan më 18 tetor, para udhëtimit te Barcelona më 25 tetor. Ndeshjet e Ligës së Kampionëve nuk llogariten për shlyerjen e një dënimi në La Liga, ndaj një pezullim prej dy ndeshjesh do ta linte Viniciusin jashtë edhe të El Clasicos.
Vendimi përfundimtar i Komitetit Disiplinor do të përcaktojë nëse ylli brazilian do të jetë në dispozicion për përballjen e shumëpritur ndaj Barcelonës. /Telegrafi/