Qeveria, në seancën e rregullt të sotme, miratoi pikën që mundëson vazhdimin dhe përfundimin e ndërtimit të pishinës së mbyllur në Ohër, një projekt kapital sportiv, realizimi i të cilit filloi që në vitin 2015. Bëhet fjalë për një nga projektet më të rëndësishme sportive dhe infrastrukturore në Ohër, i cili për gati 11 vjet ka mbetur i papërfunduar.
Pas marrjes së kompetencave, Ministria e Sportit bëri analizë dhe rishikim të plotë të gjendjes së projektit, me qëllim përcaktimin e të gjitha pengesave teknike, financiare dhe administrative që për vite me radhë e pamundësonin përfundimin e tij. Si rezultat i rishikimit të kryer, Ministria ndërmori hapa konkretë për tejkalimin e problemeve të konstatuara, ndër të cilat edhe ndryshimin e nevojshëm të projektit bazë, duke krijuar kështu kushte që ndërtimi më në fund të vazhdojë.
Për përfundimin e plotë të pishinës së mbyllur në Ohër janë siguruar 470 milionë denarë.
Me këtë, pas më shumë se një dekadë pasigurie dhe ngecjeje, një nga projektet më të mëdha sportive dhe infrastrukturore në vend merr një perspektivë të qartë për përfundim.
Pishina e mbyllur është një investim me rëndësi të jashtëzakonshme jo vetëm për Ohrin, por edhe për zhvillimin e sporteve të notit në të gjithë vendin. Përfundimi i saj do të sigurojë kushte bashkëkohore për stërvitjen e sportistëve, zhvillimin e kategorive të reja, organizimin e garave dhe avancimin e mëtejshëm të infrastrukturës sportive në qytet.