Dy persona humbën jetën pasi një aeroplan i vogël u rrëzua në jugperëndim të Gjermanisë, raportojnë mediat gjermane.
Policia konfirmoi se të dy personat që ndodheshin në bord vdiqën në aksidentin pranë qytetit Gundelsheim, në landin Baden-Württemberg.
Pas përplasjes shpërtheu një zjarr, i cili u shua nga ekipet e emergjencës.
Sipas mediave gjermane, aeroplani i vogël po afrohej për t’u ulur në një pistë pranë Gundelsheim, por për arsye ende të paqarta tentoi të rikthehej në fluturim.
Fillimisht goditi një gardh, më pas një pemë dhe përfundoi duke u rrëzuar në një vresht.
Shenjat e regjistrimit të aeroplanit u dëmtuan plotësisht nga zjarri, ndaj viktimat ende nuk janë identifikuar.
Hetuesit e sigurisë ajrore kanë mbërritur në vendngjarje dhe kanë nisur hetimet për të përcaktuar shkakun e aksidentit. /Telegrafi/