Tajvani ka pranuar sot dy avionët e parë luftarakë F-16V Block 70 nga 66 të tillë të blerë nga SHBA-ja, raportoi Focus Taiwan, transmeton Anadolu.
Avionët kanë mbërritur në bazën ajrore Chihhang në Taitung, në lindje të vendit, rreth mesditës, pasi ishin nisur nga Havai dhe kishin ndaluar në Guam.
“Ky është një moment historik i rëndësishëm për forcimin e kapaciteteve të mbrojtjes ajrore të Tajvanit. Gjithashtu, ai demonstron vendosmërinë tonë për të forcuar vetëmbrojtjen dhe për të garantuar paqen përmes forcës”, ka thënë lideri tajvanez William Lai Ching-te gjatë mbërritjes së avionëve.
Komanda e Forcave Ajrore tha se do të zhvillojë trajnime për kalimin në avionët e rinj dhe gradualisht do t’i fusë ata në shërbim operacional.
Komanda tha gjithashtu se në dhjetor të vitit 2023 themeloi Krahun e 7-të Taktik të Avionëve Luftarakë, në të cilin do të përfshihen F-16V Block 70.
Më herët sot, ministri i Mbrojtjes Wellington Ko u tha gazetarëve se “këtë vit do të dorëzohen më shumë se dy avionë”.
Shitja e 66 avionëve F-16V dhe pajisjeve përkatëse u miratua nga SHBA-ja në vitin 2019 për rreth 8 miliardë dollarë. /AA/