Njësia për pastrimin e kanalizimit në KRU “Gjakova” ka hasur në mbetje të ndryshme gjatë punës për pastrimin dhe zhbllokimin e rrjetit të kanalizimit në Gjakovë dhe Rahovec.
Sipas KRU “Gjakova”, ekipet e saj kanë punuar për orë të tëra për të zhbllokuar pusetat, të cilat ishin bllokuar nga materiale të ndryshme.
Në një pusetë në Rahovec, ekipet kanë gjetur dhe nxjerrë një pjesë të bordurës së rrugës, përkatësisht një gur skajor, i cili kishte bllokuar kanalizimin.
Ndërsa në Gjakovë, nga disa puseta janë nxjerrë sasi të mëdha zalli, gurësh, çimentoje e plastike.
“Madje edhe pirunë”, thuhet në njoftimin e KRU “Gjakova”.
Kompania u ka bërë thirrje operatorëve dhe kompanive që merren me asfaltimin dhe ndërtimin e rrugëve që të mos hedhin zhavor, gurë dhe mbetje të tjera në rrjetin e kanalizimit.
“Këto veprime vështirësojnë punën e ekipeve tona dhe në të ardhmen mund të shkaktojnë dëmtime serioze të rrjetit të kanalizimit”, thuhet në njoftim.
KRU “Gjakova” ka apeluar që mbetjet e punimeve të mos përfundojnë në pusetat dhe rrjetin e kanalizimit, pasi ato mund të shkaktojnë bllokime dhe probleme në funksionimin e sistemit. /Telegrafi/