BMW ka zbuluar zyrtarisht 3 Series të ri për vitin 2027, duke sjellë një ndryshim të madh në dizajn dhe teknologji, ndërsa për herë të parë modeli merr edhe një version M Performance më të fuqishëm se çdo 3 Series i mëparshëm.
Gjenerata e re adopton gjuhën e dizajnit Neue Klasse, të prezantuar fillimisht te modelet elektrike të markës, por BMW ka bërë disa ndryshime për ta dalluar versionin me motor me djegie nga motra e tij elektrike, i3, transmeton Telegrafi.
Në SHBA, 3 Series i ri do të ofrohet fillimisht në tri versione: 330, 330 xDrive dhe M350 xDrive. Emërtimi “i” është hequr nga modelet me benzinë, për të shmangur konfuzionin me gamën elektrike.
Modeli bazë 330 përdor një motor turbo 2.0-litërsh me katër cilindra, i cili zhvillon 255 kuaj fuqi dhe 295 lb-ft çift rrotullues. Fuqia transmetohet përmes një kambio automatike Steptronic me tetë marshe, me zgjedhje mes tërheqjes së pasme dhe sistemit xDrive me të katër rrotat.
Por versioni që tërheq më shumë vëmendjen është M350 xDrive. Ky model përdor një motor turbo 3.0-litërsh me gjashtë cilindra në linjë, që prodhon 437 kuaj fuqi dhe 428 lb-ft çift rrotullues. Përshpejtimi nga 0 në 100 km/h, kërkon vetëm 3.9 sekonda, ndërsa 330 dhe 330 xDrive e kryejnë të njëjtën sprint për 5.9 sekonda.
Të dy versionet kanë shpejtësi maksimale të kufizuar elektronikisht në 250 km/h.
Por ndryshimi më i dukshëm është në pamje. 3 Series i ri adopton trupin Neue Klasse, me një grilë tradicionale përpara dhe elemente të reja ndriçimi, ndërsa blerësit mund të zgjedhin edhe dritat e verdha M. Në anë, makina vjen me rrota 19-inç si standard, ndërsa 20-inç janë opsionale, dhe dorezat e dyerve janë të integruara në karroceri për një profil më të pastër.
Pjesa e pasme është shumë e ngjashme me atë të i3, veçanërisht në dizajnin e dritave, duke krijuar një lidhje të qartë mes modeleve të reja të familjes Neue Klasse.
M350 xDrive merr gjithashtu një paketë më agresive sportive, me spoiler të pasëm, elemente të zeza, katër dalje të shkarkimit, parakolpë dhe pragje specifike M Sport, si dhe frena M Sport me ngjyrë blu.
Edhe kabina është krejtësisht e re dhe bazohet në teknologjitë që BMW po përdor në modelet e saj më të fundit. Në qendër qëndron sistemi Panoramic iDrive, i cili shtrihet përgjatë pjesës së poshtme të xhamit të përparmë dhe shfaq informacionet kryesore direkt në fushën e shikimit të shoferit.
Sistemi shoqërohet nga një asistent me inteligjencë artificiale të bazuar në Amazon Alexa, ndërsa një ekran trapezoidal 17.9-inç kontrollon funksionet kryesore të makinës. Ndryshe nga disa modele më të mëdha BMW, 3 Series nuk do të ofrojë ekran opsional për pasagjerin.
Kabina përfshin gjithashtu funksionin My Modes, që lejon personalizimin e ndriçimit dhe informacionit në ekran, ndërsa një aplikacion video i mundësuar nga TiVo do t’u lejojë pasagjerëve të shikojnë përmbajtje televizive dhe filma kur makina është e parkuar.
Por për entuziastët, një nga risitë më interesante është “Drift Moment”.
Ky funksion do të jetë i disponueshëm në M350 xDrive dhe mund të ndërpresë fuqinë në rrotat e përparme për ta bërë më të lehtë nisjen dhe mbajtjen e një drift-i. Është hera e parë që kjo teknologji përdoret në një model M Performance.
Megjithatë, funksioni nuk do të jetë aktiv që në momentin e lançimit. BMW planifikon ta sjellë atë përmes një përditësimi software gjatë vitit 2027.
BMW 3 Series i vitit 2027 pritet të dalë në tregun amerikan në fillim të vitit 2027. Çmimi nis nga 49,900 dollarë për 330, ndërsa 330 xDrive kushton nga 51,900 dollarë. Për versionin sportiv M350 xDrive, çmimi fillon nga 65,900 dollarë.
Ndërkohë, për blerësit që preferojnë versionin elektrik, BMW i3 50 do të nisë nga 61,500 dollarë, me rezervimet që hapen më 29 shtator dhe dorëzimet që synohen gjithashtu për fillimin e vitit 2027. /Telegrafi/
