Para se të ndizni ngrohësen ose klimën, provoni disa hapa të vegjël që ndihmojnë në ruajtjen e nxehtësisë dhe në uljen e humbjeve të energjisë
Kur zgjohemi në një dhomë të ftohtë dhe radiatorët janë ende të ftohtë, zgjidhja e parë që na shkon ndërmend është të ndezim ngrohësen ose klimën. Megjithatë, ka edhe mënyra të thjeshta për ta bërë shtëpinë më të ngrohtë, pa investime të mëdha dhe pa përdorur pajisje shtesë.
Një nga hapat më të rëndësishëm është të pengojmë humbjen e nxehtësisë që tashmë ekziston në hapësirë, sidomos përmes dritareve, dyerve dhe mureve të ftohta.
Truku që bën dallimin: Hapni perdet ditën, mbyllini në mbrëmje
Ekspertët e efikasitetit energjetik këshillojnë një strategji shumë të thjeshtë: gjatë ditës shfrytëzoni dritën e diellit për të ngrohur hapësirën, ndërsa sapo dielli të perëndojë, mbyllni perdet për të penguar humbjen e nxehtësisë.
Në praktikë kjo do të thotë që në mëngjes dhe gjatë orëve me diell, perdet në dritaret ku bie rrezja direkte duhet të hapen. Në mbrëmje, para se temperatura jashtë të bjerë edhe më shumë, perdet duhet të mbyllen. Perdet e trasha krijojnë një shtresë shtesë izolimi midis xhamit të ftohtë dhe dhomës, edhe pse nuk mund ta zëvendësojnë izolimin e mirë ose ngrohjen kur temperaturat janë shumë të ulëta.
Peshqiri poshtë derës mund të ndihmojë
Një nga truket më të thjeshta është vendosja e një peshqiri të mbledhur, batanijeje ose mbrojtëseje speciale poshtë derës hyrëse ose derës së ballkonit. Nëse ajri i ftohtë hyn nga hapësira poshtë derës, kjo mund ta zvogëlojë ndjeshëm qarkullimin e tij.
Edhe dritaret dhe dyert që nuk mbyllen mirë duhet të kontrollohen. Si zgjidhje të përkohshme mund të përdoren shirita vetëngjitës, copa pëlhure ose material tjetër kundër rrymës së ajrit, transmeton Telegrafi.
Tapeti e bën dhomën të ndihet më e ngrohtë
Dyshemeja e ftohtë ndikon shumë në komoditet, sidomos në banesat në përdhes ose në ato me pllaka dhe beton. Vendosja e një tapeti më të trashë ose e një shtegu në pjesët ku qëndroni më shpesh nuk e ngroh ajrin, por e bën hapësirën të ndihet më e këndshme.
Edhe papuçet e ngrohta, çorapet e leshta dhe një batanije në divan mund ta rrisin ndjeshëm komoditetin pa shpenzim shtesë të energjisë.
Mbyllni dhomat që nuk i përdorni
Në vend që të përpiqeni të mbani të ngrohtë të gjithë banesën, më praktike është të përqendroheni në një ose dy dhoma ku qëndroni më shumë. Duke mbyllur dyert e dhomave të papërdorura, zvogëlohet përzierja e ajrit dhe ruhet më mirë nxehtësia aty ku ju nevojitet.
Ajroseni shkurt, por mirë
Edhe kur jashtë është ftohtë, shtëpia nuk duhet të mbetet pa ajrosje. Më mirë është të hapni dritaret gjerësisht për pak minuta, sesa t’i mbani gjysmëhapur për kohë të gjatë. Kjo ndihmon në freskimin e ajrit pa ftohur shumë muret dhe mobiliet.
Shfrytëzoni nxehtësinë që shtëpia tashmë e ka
Nëse dielli ndriçon dyshemetë ose muret gjatë ditës, ato mund të thithin një pjesë të nxehtësisë dhe ta lirojnë gradualisht më vonë. Kjo varet nga orientimi i banesës, madhësia e dritareve dhe izolimi, por mund të ndihmojë.
Mesazhi kryesor është i thjeshtë: gjatë ditës shfrytëzojeni diellin, ndërsa në mbrëmje ruajeni nxehtësinë. Kjo është një mënyrë praktike dhe ekonomike për ta bërë shtëpinë më të rehatshme në ditët e ftohta të vjeshtës. /Telegrafi/