Eleganca e re nuk kërkon as volum, as përpjekje të dukshme – mjafton një detaj i vendosur më poshtë se zakonisht
Pak modele flokësh shkaktojnë aq shumë mendime të ndara sa bishti i ulët. Por, nëse u referohemi pamjeve që dominuan këtë sezon në Javën e Modës në Nju-Jork, një gjë është e qartë: ky model është rikthyer fuqishëm.
Dhe këtë herë nuk vjen vetëm në një formë.
Trendi u shfaq fillimisht në sfilatën e Cult Gaia, ku modelet ecën mes një shiu petalesh me flokët të mbledhur në një variant të ulët, të quajtur “Infinite Knot”. Stilisti Karim Belghiran, i cili përdori produkte Tresemmé dhe fije shtesë flokësh, krijoi një pamje që dukej njëkohësisht e lirshme dhe e menduar deri në detaje.
Foto: Dave Kotinsky/Getty Images
Një ditë më vonë, në sfilatën e TWP, stilisti Joey George prezantoi modelin që e quajti “The Fold”. Pasi u dha formë flokëve, ai i tërhoqi prapa dhe i fiksoi me një kapëse bronzi, duke krijuar një variant jashtëzakonisht të ulët dhe të lirshëm.
Frymëzimi i tij erdhi nga artistja dhe piktorja Georgia O’Keeffe.
“Flokët pasqyrojnë stilin minimalist të Georgias. Ideja ishte të dukeshin të lirshëm, të përmbajtur, por njëkohësisht skulpturorë”, shpjegoi George.
Foto: Acielle / StyleDuMonde
Edhe në sfilatën e Tory Burch, ku frymëzimi i koleksionit ishte “kënaqësia e të veshurit”, flokët ndoqën të njëjtën frymë të thjeshtësisë së sofistikuar.
Guido Palau zgjodhi një ndarje të pastër në mes, ndërsa flokët u lidhën më poshtë me një elastik të zi, pa asnjë element të tepërt.
Në atë pikë u bë e qartë se nuk bëhej më fjalë për një rastësi, por për një prirje që po përsëritej në disa pasarela.
“Jam shumë e dhënë pas bishtit të ulët për momentin”, tha stilistja e flokëve dhe profesionistja e Aveda, Antoinette Beenders, në prapaskenën e sfilatës së Maria McManus.
Sipas saj, flokët mund të lidhen në mënyrë klasike, të krijojnë një formë të lirshme ose edhe të bëhen nyjë. Pamja të kujton deri diku të ashtuquajturin “Olsen Tuck”, një stil i njohur në botën e modës, ku flokët futen lirshëm nën jakën ose pjesën e sipërme të veshjes.
Foto: Chloe Malle
Avantazhi më i madh i këtij trendi është pikërisht fleksibiliteti.
Bishti i ulët mund të jetë i lëmuar dhe elegant, i lirshëm dhe paksa i çrregullt, i lidhur me elastik, me kapëse apo i formuar si nyjë. Kjo e bën të përshtatshëm si për një pamje të përditshme, ashtu edhe për kombinime më të kuruara.
Dhe duket se do të shohim edhe më shumë versione të tij ndërsa java e modës zhvendoset në Londër, Paris dhe Milano.
Foto: Acielle / StyleDuMonde
Shkrimtarja e modës e Vogue, Hannah Jackson, e provoi vetë një nga këto variante gjatë sfilatës së Tibi, duke i fiksuar flokët me një kapëse në nuanca guaske breshke, dhuratë nga nëna e saj.
“Njerëzit e dalluan menjëherë pamjen. Mora shumë komplimente”, tregoi ajo.
Mes modeleve të ndërlikuara dhe stilimeve që kërkojnë shumë kohë, këtë sezon po fiton terren pikërisht e kundërta: një lidhje e ulët, e thjeshtë dhe e qëllimshme.
Dhe ndoshta kjo është arsyeja pse po funksionon kaq mirë. /Telegrafi/