Ministri i Mbrojtjes, Ejup Maqedonci, ka bërë të ditur se pjesëtarët e KDS-së kanë përfunduar Kursin e Avancuar për Snajper, në kuadër të përpjekjeve për ngritjen e kapaciteteve profesionale dhe operacionale të Forcës së Sigurisë së Kosovës.
Përmes një postimi, Maqedonci ka thënë se kursi është fokusuar në detyrat e vëzhgimit, zbulimit dhe mbledhjes së informacioneve në zona me rrezikshmëri të lartë.
Gjatë trajnimit, pjesëtarët kanë avancuar aftësitë në planifikimin e misioneve, qitjen me precizion, kamuflimin, fshehjen dhe lëvizjen, si dhe në teknikat e përndjekjes dhe vëzhgimit.
Sipas ministrit, pjesë e trajnimit ka qenë edhe identifikimi dhe angazhimi i caqeve.
“Një nga objektivat e Ministrisë së Mbrojtjes është ngritja e kapaciteteve profesionale dhe operacionale të Forcës së Sigurisë së Kosovës”, ka shkruar Maqedonci.
Ai ka theksuar se institucionet do të vazhdojnë investimet në profesionalizmin dhe ngritjen e kapaciteteve operacionale të FSK-së./Telegrafi/