Tifozët e Ligës Premier do të mund të dëgjojnë për herë të parë live bisedat mes gjyqtarëve dhe lojtarëve gjatë ndeshjeve, duke u bazuar në teknologjinë “Ref Cam” të përdorur sezonin e kaluar, raporton The Times.
Ky zhvillim shënon një tjetër hap drejt rritjes së transparencës në gjykimin e ndeshjeve.
Fragmente të përzgjedhura të bisedave do të transmetohen pak çaste pas incidenteve kryesore në një ose dy ndeshje me “Ref Cam” për çdo xhiro.
Megjithatë, zbatimi i kësaj risie nuk do të nisë gjatë javëve të para të sezonit.
Në mënyrë të rëndësishme, bisedat që lidhen me rishikimet e VAR-it do të mbeten jashtë transmetimit, në përputhje me rregullat aktuale të IFAB-it.
Lukas Brud, përfaqësues i këtij institucioni, ka paralajmëruar se transmetimi i këtyre bisedave mund të krijojë një “përvojë kaotike për shikuesit”, si dhe shqetësime për sigurinë e gjyqtarëve.
Liga do të nisë gjithashtu të publikojë çdo javë vendimet e panelit për incidentet kryesore të ndeshjeve, si dhe citimet e drejtpërdrejta të gjyqtarëve në X, duke hequr dorë nga shpjegimet e përmbledhura që përdorte deri tani./Telegrafi/