Në pishinat natyrale të Banjës së Malishevës është mbajtur gara memoriale e notit “Esmir Shala”, e organizuar në nderim të noterit Esmir Shala dhe me synim promovimin e notit te të rinjtë.
Gara u organizua nga Federata e Notit e Kosovës, Klubi i Notit “Besa” dhe Komuna e Malishevës.
Në ceremoninë e hapjes morën pjesë kryetari i Komunës së Malishevës, Ekrem Kastrati, nënkryetari Vesel Krasniqi dhe drejtoresha e Drejtorisë për Kulturë, Rini dhe Sport, Teuta Miftari-Mazreku.
Kastrati tha se Komuna e Malishevës do të vazhdojë ta mbështesë sportin dhe sportistët, brenda mundësive të saj.
“Sportistët janë ambasadorët tanë më të mirë, prandaj jo vetëm këtë garë, por edhe çdo lloj sporti, Komuna e Malishevës, brenda mundësive që ka, do ta përkrahë. Sot nderojmë sportistin dhe notarin e njohur, Esmir Shala, dhe mbajtja e garave në nderim të një sportisti tregon më së miri përkushtimin tonë si institucione dhe si shoqëri. Ju uroj të gjithëve suksese në këtë garë, si dhe në garat dhe kampionatet e notit. Zoti i bekoftë sportistët tanë”, tha Kastrati.
Në edicionin e sivjetmë morën pjesë rreth 100 garues nga 12 klube të notit, ndërsa garat u zhvilluan në gjashtë kategori.
Gara memoriale “Esmir Shala” synon të ruajë kujtimin dhe të nderojë figurën e noterit Esmir Shala, ndërsa njëkohësisht të kontribuojë në promovimin e notit dhe sportit tek të rinjtë. /Telegrafi/